Acts 5

Ananiaki Elenaho Sahilaki Gamazi Gosoho' Lasingumu' O'moso'mo Lihime nGimine' Gamazi

1Banabasi' ne'mine ine'za ve ma gulive Ananiakisi elenaho Sahilakisi angise'ine gamazi li gili ebe' za zuho'ine evene' ma ngimi a'midoti' moni dasine' nene lingela di halekisa lingela Anania' do vo aposolo ngimine'. 3nGemavo Petolo' ti' lo lo-imine': Ananiazo. Gaza Satani'mo lemo lukau' gono davo nanimu' O'moso'mi Sikalahu' soza gani lo-emo misubo'mi meni lingela do halekekane. 4Misuboka geita minelinako gasika gelo ngemaine' ma ve. Ido' ngemo meni daine' nene gei' monika neine'za la'lise voku' lo-gedamune. Nedunu' do inite' mataka dalo ma dalinako gei' luka'mo goka izavo nanitekumu' ne'mine ane. Evene' soza lo-limuhe lo O'moso soza lo-emo golo izane. 5Ti' lo nolo-imivo Anania' nogelo nogelo lemo pou' lo ongo hiline'. Helavo ningi gilave nene ngehelele naba izine'. 6Izipe goso've minani' nete gonoso nene lavolavotunu' asabu' izi di vi galese izi-dani' ve. 7Galese izi-dikevo gamene tili aua ne'mine ngomo mine ha'na noogo elenaho a'mine gamazi gelamo vanaho ha neihe lo ogo heteline'. 8Hetelavo Petolo' ti' lo longo' o-do line': Olo. Misuboloti' meni've mo a'nevo' dasine' nehe. Ne'mine lavo aza ti' lo line': Oo. Mo a'nevo' ve. 9Lavo Petolo' ti' lo lo-imine': Lingine nanitekumu' gamazi li halekiki Guvelesi ve'mi Sikalahu' golo izasive. Vangahine di galese izi-dave ma nesu gateda lidi lidi li niigi lanako gezesi a'mine a'mine igi di vi galese izi-gidilisave lo nolo-imivo 10nogelo galinali lo gizeneu' lemo pou' lo ongo hiline'. Helavo goso've nete dizi gonoso ne ningi di vi vanahine galese izi-dado' galese izi-dani' ve. 11Galese izi-dikevo noso hilave mukikisi evene' linge ma a'mine gamazi gilave mukikisi nene ngehelele naba izivo minani' ve.

Aposololite Ele'vole' Inite' Ato Atoli'mine Di Soto' Ani'

12Aposolo ingine ato ato' suno di eveneta inite' ato ato' muki' di soto' iga' ani'. Ido' Izesu'nimu' gili ele'vole' iga' ave muki' lu'ine di hamo' igi mini mono' numuno naba'mi he' numuno ma gizikani' ma gulive Solomoni' ve lo minine' neu' nene di gese' igi minaa' ani'. 13Nizavo evene' heta minavete engikumu' sizaga li di naba i-ngidani'za ngehelele izavo vi engita gi'mizamani'. 14Vi gi'mizamani'za vene' vemoho' muki' vanu hizi igi gili ele'vole' igi Guvelesi vela igi imine' mili gi'mizaa' ani'. 15Ne'mine ikevo gebili nabili inite' gizi davesi ngele'mizi vi Petolo' ogo novivo mumuno'mo nesi linge ma avuto' ngebelavo lamine' ilizahe li holomosi ingaa' ani' initekisi di vi akalo' huli ngimika' ani'. 16Zelusalemi ebe' gahevela ingani' aleve mukikisi igi engita inite' gizi dani' alevesi ido' lu'ningu' sikalahu' golosoli'mo mino do goloso o-ngedo minivesi ngele'mizi ikevo di lamine' igi osu' li-ngidani' ve.

Aposolo Goboni Mili-ngidani' Gamazi

17Ne'mine igi nizavo eveneto' medelo mino O'moso inite' lehize-daa' ive nabasi ezela igi gi'mizave muki' ado' Sadukaio' aleve a'mido' mulise milaa' ave engikuti' minikevo ngizebolo' goloso molavo 18aposolo a'nido' di gili' li ngele'mizi di vi evene' mukiliti nala' numuno gizikangu' huli-ngidani'. 19Huli-ngidikevo nizavo holuka' liti'musou' Guvelesi ve'mi angelo' mali'mo ogo nala' numunguti' akahe si'ze-ngedo ngele'mize heto' ogo ti' lo line': 20Vi mono' numuno nabau' oti mini O'moso'mo do lu' izavo minevo' minevo' ogo minaa' gosoholi'mi monovomu' gamazi muki' nene li soto' igi evene' li-ngimi minilo. 21Ne'mine lavo gili go' lolosa neivo mono' numuno nabau' dizi a'mine gamazi li soto' i-ngimi minani'. Nizavo eveneto' medelo mino O'moso inite' lehize-daa' ive nabasi ezela gi'mizi minavesi di nubo igi engi' Isilaele' aleveti gizebo veti kanisole naba'ine vise li di mulise mili-ngidi a'mine ve ngele'mizi alizave li pilisi ve ma nala' numuda ngimiselani'. 22nGimiselikevo vi ningani'za nala' numungu' nene nizamavo vise' igi di tibizi vi ti' li li-ngimani': 23Vune'za nala' numuno'mi akahe nene gizi gili' likevo gatedo' gizebo iga' ave nene ha oti nizavo ningune'za akahe si'zune' nene evene' hamokisi ma nizamavo ningune' ve. 24Likevo mono' numuno nabau' gizebo iga' ave ado' pilisi veti guve'inesi ve nabasi eveneto' medeli mini O'moso inite' lehizi-daa' ave nabasi gili aposolo nadi' ahe li gopo ga'ine gili alinge' nene inite' ma nadi' ogo soto' ilihe li lani'. 25Ne'mine li nizavo ve mali'mo ogo hetelo ti' lo lo-ngimine': Mene gililo. Lingine nala' numungu' huli-ngidave nene mono' numuno nabau' mini evene' mono' li-ngimi nizave. 26Lavo pilisi veti gizebo ve'ine aza pilisi ve ma ngele'mizo vo aposolo ngele'mizo ani'. A'mine pilisi ve nete ngele'mizi ani'za evenelite gehenidunu' libilikelizave li golise gili ngibilami zou li ngele'mizi ani' ve.

27nGele'mizi kanisoleti vovo'ningu' huli-ngidikevo nizavo eveneto' medelo mino O'moso inite' lehize-daa' ive naba ne'mo ti' lo longo' o-ngidine': 28Laza a'mine ve'mi gulive igi li-ngimi' ngimi' amilo lo amuzo molo lo-lengemamune' nehe. Olo. Lingine peleseve' izi a'mine gamazi nene Zelusalemi numungu' li hutile' ikevo buu line' ma ve. Ne'mine igi a'mine ve bilaveliti lihime'ine nene leli' okodela dizelive lisa nahe. 29Lavo Petolole aposolo linge masi di velepe' izi gamazi ti' li li-imani': Eveneliti gamazi gele do O'moso'mi gamazi gele hulaa' ne ma nomive. 30Lingine Izesu'ni lohoto' zalo' bili hilikevo avotemoteliti O'moso'ine ne'mo do ote-dine' ve. 31Otavo Isilaele' aleve lingine lutine di velepe' izikevo lihimetine hulo-lengedelive lo Guvetesi ve ve lo ido' do lu' izaa' ive ve lo O'moso'mo ei' amuzodunu' do dize-davo neive. 32Ido' a'me luvoni' inite' nene ningo gelosa a'minemu' lo soto' o lengemelonive nene leli' ne none. Ido' lelikovo' nomive. O'moso'mi Sikalahu've nesi nene lo soto' oga' neive. A'mine Sikalahu've nene O'moso'mo eze gamazilo' gele daa' unive nene leme neine' ma neive lo lo-ngimine'. 33Ti' lo lo-ngemavo ngizebolo' goloso molavo mo ngebelelone li gilani'. 34nGebelelone li gilani'za Zuda veliti kanisole mulise nabauti' ve ma Halisaio' ve aza Mose' lou' gamazi gize ngimine' nene apize ngemaa' ivo evene' muki' ezemu' gilavo dize minive ne'mi gulive Gamaliele' ne'mo oto aposolo vi heta igi gamene ngomo minilizave lavo vi minikevo 35kanisole alevemu' ti' lo lo-ngimine': Isilaele' aleve neze zuhokizo, lingine a'mine ve nadi' i-ngidilizahe. Gatine gili nge li minisa i-ngidilo. 36Gamene gozopo' aka'mila ve ma gulive Teuda' aza oto ve guve'nesi ve naba nouve lavo evene' fo hadeti (400) ne'mine ezela gi'mizani'za alinge' ngamani nete me'nibine bili hilikevo ezela gi'mizave nene hutile' igi vi haha ikevo a'mine inite' osu' line'. 37Ido' alinge' gulivete gizani' gamenela nGalilaia ve ma gulive Zuda' ve lo minive ne'mo oto evene' linge ga'ine do lovo do soto' ogo ngamani ngebelelone lavo gili imikevo lovo hizangu' nene Zuda'ni bili hilikevo eze aleve muki' vi hutile' igi vi halekani'. 38Nemu' ne mene vemu' lo-lengemeloze. Gililo. Lingine huli-ngimikavo haza minilizave. Ingine di soto' ani' inite' nene haza evenelite ga'ine gili gono di di soto' ani' noline' nene mo gopo ogo haha oloseive. 39Ido' O'moso'mo hize ele' o-ngedo minivo di soto' ani' noline' nene lingine O'moso ivile' igi ingine gono nidangumu' nene ngeli o've li li-ngidilizahe. O'mososi lovo i imi minikelizave lo nemu' nolo-lingimuve lo lo-ngimine'. Lo-ngemavo ingine gili di 40aposolo gohi ngele'mizi numunguko dizi lobuno gavosodunu' ngibilivi' ngibilivi' igi Izesu' gulive igi evene' li-ngimamilizave li li huki-ngidi ngimiseli hulani'. 41Ido' ngimiselikevo a'mine kanisole alevesi minadoti' huli-ngidi ngolize izi'mi limi vani'. Ido' ngolize izi'mi limi vani' nene ingine O'moso'mo lelikumu' gelavo lamine' ogavo ingine Izesu' gulive di minangumu' ve li biluvalite di'mi limi-ngidi ngibililizani' nene monoku' amuzo'ine nene a'mine geni ha gihilizado' lisihe' o neive lo giline' noloseive li ngolize izi'mi vani' ve. 42Ne'mine ogavo gamene gamene mono' numuno nabaukisi numudasi O'moso'mo do lu' izelive lo imiselelesa live nene Izesu' minine' nenako nemu' gamazi lamine' nene di halekami li soto' igi apizi ngimi' ngimikovo' igi minani' ve.